UN Convoy, Laiza le Bawmhchanhnak:
Kan hnu June thla, Kawl cozah nih Kachin raal a hraan hnawh hna thok in tuzarh Monday ah UN rianttuantu bu hna cu KIA headquarter Laiza an phan. Hi hi UN nih Kachin ralzaam IDPs an tlawn hna a voikhatnak a si. UN convoy ah aa telmi palai hna cu UNICEF, UNHCR le OCHA timi UN bu ttengnge hna in an si. UN palai pawl cu Kachin Refugee Relief Committee he ttha tein biaruahnak an ngeih hnu ah refugee tambik umnak IDP camp paruk an zohpi hna. A tu bantuk in UN nih an tlawn hna hi a voikhatnak a si caah KIA le IDPs refugees pawl cu an i lawmtuk hringhran. Thinlung lei zongin thazaang tampi an ngah. UN palai pawl hi tuan deuh lio pi khan kal an i tim peng ko nain Thein Sein cozah nih kalnak nawl a pek duh hna lo caah an kal kho lo. A liam cia zarh ruk tluk hrawng khan Kachin IDP refugees pawl dirhmun cu a zualhma lei a panh chin lengmang caah mibawmtu NGO tampi le Human rights activists tampi hna nih biatak tein an aupi. Vawleicung ah mibawmtu bu nganngan a si mi Refugee International, Physicians for Human Rights, Partners le, Human Rights Watch zong nih hi hna kong he pehtlaiin warning peknak ca (statement) an chuah.
Laiza base IDPs and Refugees Relief Action Network i co-ordinator a si mi Pu La Rip nih cun UN palai hna sinah lunglawmhnak a chim pah in, "A tu bantuk in UN nan rat hi a donghnak si hrimhrim hlah seh, UN nih hin hmailei ah bawmhchanhnak kan hmuh khawh lengmang nak hnga IDP camps pawl zong ningcang tein survey nan kan tuah piak kan duh ko" tiah a ti. UN nih bawmhnak an vung phorhmi hna cu, UNICEF nih chungkhar 300 daih relief kits le UNHCR nih chungkhar 500 daih relief kits hna an si. Hi relief kits ah aa telmi hna cu chungkhar khuasak tintuknak ah a herhmi thilri pawl deuh lawngte an si.
Hi lio ah, Kawl cozah le Thein Sein party USDP MPs pawl nih an hlut vemi hna cu Kachin nih an cohlang duh lo, an hnawl piak hna. Hi hnawl mi bawmhnak chungah aa telmi thilri hna cu thil lum zuun 1,000, chungkhar 1,000 daih chungkhar hmarua le cafang tun 300 a si. Cun, Kawl cozah zohkhenhnak tangah a ummi Kachin State Red Cross sin in a ra mi bawmhnak zong an hnawl piak hna. Cu hna nih an bawmhmi hna cu chungkhar 400 daih hman chom thilri pawl an si. Kachin unau hna nih a tu bantuk in bawmhnak an hnawl cu an mawh hrimhrim lo. Thah cuahmah, nawn cuahmah bu in 'bawmhnak kan pek' cu an caah lungfah zualtertu men a si.
Kan hnu June thla thok in Kawl nih raal an hraan hnawh hna ruangah refugee dirhmun a phanmi Kachin miphun hi 56,000 hrawng an si lai tiah zumh a si. Hi chungah 30,000 leeng kai hrawng cu KIA controlled area chungah an um. 15,000 in 20,000 karlak hrawng hi Taluk ramri chunglei camp ah an um. Cun, a dang 6,000 in 8,000 hrawng hi Kawl cozah control mi area chungah an um, tiah zumh a si.
Kan hnu zarh December 10 ah Naypyidaw ramhun Thein Sein nih Kawlram ralkap lutlai sangbik Min Aung Hlaing sinah Kachin an kahmi cu ngol chung rih dingin ca a pek tiah theih a si. Cu ca cu tuzarh Monday ah khan Kachin State Chief Minister nih Myitkyina City Hall ah zapi theih in a rel piak hna ti a si. Nain, KIO nih cun KIO khua nganbik pahnihnak Mai Ja Yang khua kiangah kawl ralkap tam chinchin in an van chiah thluahmah ko hna, tiah an ti ve.
[Thawnghnar Chirhchanh: BNI]
Van T Cung
Maryland
laiforum