Thein Sein, Daw Suh le Tlangcung Mi!

  Thein Sein cozah, Daw Suh le Tlangcung Mi:   Ko Thein le Daw Suh i helhnaihnak cu tlam a tling cang. Naypyidaw pasitor nih lehthah ding lawng a taang. A ra lai mi kumthar ah MP seats lawngmi 48 cu Daw Suh caah zuah piak a si lai i, cuticun ruun khat ah Ko Thein he kutsih in ro an reel tti cang lai. Kawl le kawl, buddhist le buddhist kutsihnak nih Tlangcung mi covo le tthatnak  zeitluk tiang khi dik a chuahpi te hnga. Cu hlan ning bantuk in ngunchaw le tthanchonak hmang in hlen an kan zuam rih ko lai tiah zumh a si. Atu zong an kaa nih cun democracy a ti cuahmah nain an kut cu tlangcung mi thisen in a khat. Nifatin ti awk in hriamnam he tlangcung mi cu an kan dum cuahmah ko. Hi thil vialte hi Thein Sein le Daw Suh nih an i theihter lo. An hmur an ciip. Cucaah, Dr. Ngun Cung Lian nih cun, Thein Sein, Daw Suh le World Community nih hin Tlangcung mi hna nih kum 60 lengkai kan tuar-innak hi faak piin an kan theih piak kho hrimhrim lo ee, tiah a ti. A ngaingai tiah cun, an theih khawh lo siloin an i theihter duh lo bia tu khi a si. Asiloah, thuhnawh mite an ngeih ziar ca zongah a si kho. Thein Sein le Daw Suh nih hin Kawlram pumpi cu zeitluk hmanh in democracy lam lei ah hruai ko hna hmanh sehlaw, Tlangcung mi hna kan covo tlamtling tein an kan pek tthan hlan lo cu Tlangcung mi kan caah sullam a ngei taktak kho lai lo.    Cun, ralkap cozah nih hin Tlangcung hriamtlai bu pawl hrawh nak ding caah Plan-A le B an ngeih. Plan-A cu hriamtlai bu vialte ramri veng ralkap (Border Guard Force) ah thlenter i cuticun hloh colh dih ding kha a si. Cucu faak ngaiin an nor cang. Nain, an awng-min lo. Cu tikah Plan-B ah an kai. Plan-B cu hriamtlai phu pawl a pikpak tete in lem i an hriamnam he ramri kulh pakhat khat chungah khumh ding kha a si. Phundang in chim ahcun Farm-Arrest tuah ding kha a si. Cucu Thein Sein cozah nih tactic phunphung hmang in an kalpi cuahmah mi cu a si. Hi bantuk tuahsernak hi cu an va hlawhtlin hmanh ah zeimawcan chung kahdaihnak ca lawng a si. Peace taktak a si lo. Silence deuh tu a si. Tlangcung hriamtlai bu hna nih an duhmi cu zungzal a nguh dingmi daihnak lawnglawng kha a si. Cucu cabuai cungah lungtlinnak minsen thutnak lawnglawng in hmuh khawhmi a si.    Cucaah a si lai, kan hnu zarh ah Tlangcung hriamtlai bu vialte fonhnak bu UNFC Secretary Naing Han Tha nih  Kawl cozah nih remdaihnak an kan offer mi cu tlangcung ethnic miphun pawl i funtomnak tthek-darhter nak ding ca lawng a si, hi nih hin khoika hmun hmanh a kan phakpi lai lo, tiah a ti.   Cun, "Kawl cozah nih cun miphun state dang cio an si, an herhnak le an case aa lo cio lo a ti i UNFC chungtel pawl cu pakhat tete in a dang cio in a kan helh. A dang cio in ceasefire tuahpi a kan duh. Hihi kan zoh tikah tthenhmal a kan duh bia a si tiah kan rauh. Hi bantuk in a pikpak i agreement tuahnak nih hin a kal cuahmah mi kumtluang daihnak, genuine peace process tu kha khua a hnut ter chinchin ding khi a si. A donghnak ah cun constitution ah an ttial cia cang bantuk in ramri veeng ralkap (Border Guard Force) asiloah, kawl ralkap nih direct in control tuahmi hriamtlai bu sawhsawh ah canter te ding khi a si ko." tiah a ti fawn.   United Nationalities Federal Council timi UNFC cu nikum February thla thok in dirh a si i, tukum November thla tiangah chungtel 12 an si cang. Tlangcung hriamtlai bu an tling nawn. Tlangcung ralkap vialte i fonhnak bu Union Army zong dirh a si cang. A tuning a si ahcun Thein Sein cozah nih hin national recociliation taktak tuah a duh lo peng ahcun Kawl miphun le Tlangcung mi karlak ah faak taktak in buainak a chuak khomi dirhmun kan phan.   Van T. Cung Beltsville   Note: Hi ca hi keimah pumpak hmuhning lawng a si.