Buanchukcho in minung pariat lawng an rak luat nain caan tlawmpal hnu ah cun thong tampi ah an hung karh ṭhan. Cun Buanchukcho hnu kum 352 ah Abraham cu a rak chuak. Abraham sin ah fapa pakhat Isak a peknak thawng in Pathian nih zei tluk in dah a biakam a rak zulh ti kan hngalh khawh. Cun Isak a fapa pahnih lak ah Jakob cu Pathian nih a rak thim.
Jakob nih fapa 12 le fanu dang hna a ngeih hna caah a nganmi innchungkhar a rak ngei. Jakob a fapa 10 hna nih an naupa Josef cu an rak huat i Izipt ram ah sal ah an zuar. A hnu ah Josef cu Izipt ram i nawl ngeimi uktu bawi ah a rak cang. Mangṭam fakpi a rak tlun lio ah Josef nih a u le cu an lung an i thleng cang hnga maw ti hneksak a rak del hna. A donghnak ah cun Jakob a innchungkhar vialte, Israel mi hna cu Izipt ram ah an rak i ṭhial dih. Cucu Abraham a chuahnak in kum 290 hnu ah a rak si.
Khi hnu kum 215 chung Israel mi hna cu Izipt ram ah an rak um. Josef a thih hnu in, cuka ram ah cun sal ah an rak cang. A hnu ah Moses kha a rak chuak i Pathian nih Israel mi hna Izipt ram in luatter tu ding ah a rak hman. A zapi tein Ṭhen HNIH chung ah hin kum 857 chung tuanbia aa ṭial.