Pathian Nih Zeidah A Kan Hal? Cawnnak 1 Pathian Nih An Halmi Na Hngalh Khawhnak Lam Zeibantuk a biapimi hngalh awk bia dah Baibal chungah a um? (1) Baibal chuahtertu cu ahodah a si? (2) Zeicahdah Baibal cu na cawn awk a si? (3) 1. Baibal cu Pathian sinin a man a sungmi laksawng a si. Hi cu dawtnak a ngeimi pa pakhat sinin a fale sinah cakuat pakhat bantuk a si. Baibal nih Pathian kong biatak—amah cu ahodah a si i, a rikhiah micu zeidah a si ti kha a kan chimh. Harnak kha zeitindah tei khawh a si i, a hmaanmi lunglawmhnak kha zeitindah hmuh khawh a si ti a fianter. Baibal lawnglawng nih Pathian lung lawmhter awkah zeidah kan tuah awk a si ti kha a kan chimh khawh.—Salm 1:1-3; Isaiah 48:17, 18. 2. Baibal cu minung 40 hrawng nih B.C.E. 1513 in i thok in kum 1,600 leng chungah an ṭial. Hi cu cauk fate 66 in komhmi a si. Baibal a ṭialtu hna cu Pathian nih a thaw a chuahhnawhmi hna an si. Anmah ruahnak si lo in Pathian ruahnak kha an ṭial. Cucaah vawlei cung minung ahohmanh si lo in, vancung i a ummi Pathian cu Baibal chuahtertu cu a si.—2 Timote 3:16, 17; 2 Piter 1:20, 21. 3. Pathian nih Baibal cu hmaan tein a tlenter hna i a kilven. Cauk dang zeihmanh nak in Baibal cu tam deuh suaomaupi chuah a si cang. Baibal na cawnmi an in hmuh tik ah mikip an i lawm lai lo, sihmanhsehlaw mah nihcun in ngolter hlah seh. Zungzal na nunnak cu zeibantuk ralchannak lak zong in Pathian na hngalhnak le a duhnak na tuahnak cung ah aa hngatmi a si.—Matthai 5:10-12; Johan 17:3.