Voikhat cu Khrihfami pastor pa pakhat le budis biaknak a biami Kawl pa mawṭaw a mongmi pakhat an um an ti. Pastor pa cu Pathian riantuantu a si bantukin zarhpini pumh caan paoh ah hin phung a chim peng. Cu pastor pa phung a chim paoh ah hin a phungchim a ngaitu mi zaapi hi an ngu hna i an i hngilh peng hna ti a si. Zum lotu (Budis biaknak a biami) Kawl pa, mawṭaw mongtu pa cu a mawṭaw mongh hi a rang tuk. Cucaah cun a mawṭaw ai citmi paoh an thin a phang tuk hna le Pathian sinah thla an cam peng hna an ti.
Nikhat cu pastor pa le mawṭaw mongtu pa cu an thi veve i, pastor pa kha Hell ah a tla le zum lotu,mawṭaw mong pa kha Vanram ah a kai. Cuticun pastor pa cu a thin hang tuk le Vanmi pawl kha a auh hna le hitihin bia a hal hna- " Zeiruangah khi Kawl pa budis biaknak a biami,mawṭaw mong pa khi Vanram ah a kai le kei vial Hell ah ka tlak?" tiah a hal hna. I, Vanmi nih an lehmi cu "Pastor pa nang cu Vawlei i na um lioah khan phung na chim paoh ah ai pummi an ngu dih hna i an i hngilh peng, mi na ngutter dih hna caah ahohmanh an thlarau na tlai kho hna lo. Nang tham cu phung na chim ah pei ai pummi an ngut tuk cu. Khi Kawl pa, mawṭaw mongtu pa tham cu a mawṭaw mongh a rang tuk i pei amah mawṭaw ai citmi paoh a zungzal in thla an cam i, an thlacam thawng hi Vanram ah a khah in a khat, a zelh in ai zelh cu" tiah an ti.
Salai Biak Lian Thawng
O.J.Kaarbøs gate 4
8300 Svolvær
Norway
BAWI NEWS
